دنيا جون شاعر عورتون

دنيا جون شاعر عورتون (ڪتاب): هـي ڪـتـاب انگـريــزي ڪـتاب (The Penguin Book of Women Poets) جو سنڌي ترجمو آهي، جيڪو سنڌي ٻوليءَ جي ماهر ۽ نامياري ليکڪا ڊاڪٽر فهميده حسين ڪيو آهي. هن ڪتاب ۾ دنيا جي مشهور شاعر عورتن جا بهترين نظم شامل آهن. هن ڪتاب جي مهاڳ ۾ ڊاڪٽر فهميده حسين لکيو آهي ته: ”هن ڪتاب ۾ عيسوي سن کان به اڳي جي شاعرائن کان وٺي ويهين صديءَ جي پڇاڙيءَ تائين، يونان جي سيفوءَ کان وٺي هندستان جي امرتا پريتم تائين جي شاعرائن جي خيالن، جذبن ۽ احساسن ۾ هڪجھڙائي حيرت ۾ وجھندڙ آهي. هن ۾ سماجي سطح تي عورتن سان ٿيندڙ ڏاڍاين ۽ ظلمن جو هڪ لاڳيتو سلسلو نظر اچي ٿو.“ هن ڪتاب ۾ سنڌ مان ڪنهن به شاعره جو شعر نه هئڻ تي ڊاڪٽر فهميده صاحبه مهاڳ ۾ سنڌي شاعرائن جي شاعريءَ تي تفصيل سان لکيو آهي.
ڪتاب جا ٻه اکر هدايت بلوچ لکيا آهن، جڏهن ته ’ڪجهه نوٽس‘ نامياري شاعر امداد حسينيءَ به لکيا آهن. هيءُ ڪتاب سنڌي ادبي بورڊ، ڄام شوري، سال 2006ع ۾ ڇپائي پڌرو ڪيو. 208 صفحن تي مشتمل ڊيمي سائيز جي هن ڪتاب جي قيمت 140 روپيا آهي.

ڪتاب - ڀاڱي جون ٻِيون داخلائون